陸羽仁(11/09/2008): 心理質素

美股大跌後穩住，能源股回升，加上聯邦快遞的業績理想，帶領杜指反彈，一度升近１１３７９點的高位，但尾市又出現壞消息，第４大證券行雷曼兄弟被評級機構穆迪放入觀察名單，金融股再挫，杜指升幅收窄，收報１１２６８點，升３８點，升幅０．３％。

雷曼見分析員不斷調低其業績預測，怕愈講市場情緒愈不穩，提早一星期公布季度業績，第３季蝕３９億美元，每股虧損５．９２美元，差過市場平均預期的虧損３．４３美元，雷曼計在第３季裁員 １５００人節省開支，以及準備變買手中有價值的資產管理部門。但市場擔心雷曼行動得唔夠快，令佢滑入執笠危機中，而穆迪話要將雷曼放入觀察名單，亦令佢在最後一個鐘頭交易時再插，結果雷曼跌６．９％，跌到７．２５美元。其他金融股亦大插，例如美林就跌５．９％。

另外紐西蘭央行宣布減息０．５厘，到７．５厘，大過市場預期，紐西蘭央行估計衰退已經到臨，是９８年以後首次衰退，所以唔使擔心通脹，反而要大手減息對抗衰退，央行估到２０１０年通脹可以回落到３％的水平。紐西蘭大幅減息後，紐元跌到２２年以來的低位，股市則上升。紐元仍弱勢，可能要等佢減定息先可以企穩。

恒基主席李四叔早前的股市點評惹起好多股民評論，可以講講。早兩日李四叔出來話自己「唔開心，無心機」，因為佢本來估恒指會見２３０００點，怎知忽然跌穿２００００萬，佢嘆道看淡的人睇錯市無人會話，但看好的睇錯就好麻煩，現時人人看淡，你一起看淡無人會鬧你，因此年底看２３０００點的講法不敢再講，以免被人鬧。他更表示無眼睇，剛去北海道旅遊散心一星期。

李四叔出現一個散戶典型的現象，就係不想接受股市和自己估計不符的現實，所以出現「無眼睇」的反應。其實股市難測，１０次睇中７次已經好叻，無可能次次中，但投資是否成功，關鍵不是睇中時如何順勢而行，而是睇錯時如何自處，好多散戶第一個反應是唔認錯，不但不止蝕，還要加注，加到無錢再加，股價還是朝自己估計相反的方向走時，就出現第二個反應，就係無眼睇。無眼睇最大的遺害是錯失合理回應的機會，例如跌了１０％無減持，但跌到２０％、３０％時本來還有減持機會，但你唔去睇，唔做嘢，就任由股價滑到令你好傷的境地。

李四叔還有一個說法，早前他說９月可以在股市轉守為攻。而家大市續跌，李四叔自然無得攻，但佢現在話９月股市無力，新曆９月不成，希望農曆９月可以復甦，到時可以博一博，估計年底前會好些。這是散戶另一種毛病，就係堅持自己錯誤的看法，一錯再錯。既然原本估計９月股市會好轉的假設無兌現，點解農曆９月個市又一定會升呢？

我唔係估緊農曆９月個市會點，而係講緊一種炒股手法及良好的心理質素。落注估下個月股市會升，結果個月唔升仲跌，一般散戶會「希望」遲啲會中，希望自己唔係估錯，以為方向係啱，以為只係睇得早咗少少，所以遲啲會啱番。炒股不能以「希望」主導自己的行為，不能以情緒取代理性。若果落注估９月會升，去到一半見個市唔升仲要跌，就要認輸止蝕，唔係希望遲啲啱番，有時錯開有條跌，一錯可以再錯。

股市中的高手，重視遵守下注原則，多過一次的輸贏，遵守原則而輸，好過不遵守原則而贏，不遵守原則而贏，贏的是運氣，運氣唔係次次有，咁玩法最後一舖錯到底就清袋。遵守原則而輸，買１０次中６、７次，只要輸時輸得少，贏時贏得多，夾埋就可大勝。以四叔的例子，估９月大升無出現，就唔好再希望農曆９月會升，睇定啲再去估都未遲。

不過李四叔有一個講法好啱，佢話佢雖然睇好，但個市跌緊，「寧買當頭起，莫買當頭跌」，這是炒股名言，即係話炒股要順勢，即使股市升或跌到不合理，佢可以更不合理，你以為股票已經跌到好殘，佢仲可以再殘好多。升緊的時候難估頂，正如而家跌緊的時候難估底一樣，要想逆勢而做，風險好大。